شعر طنز حمید آرش آزاد  به مناسبت سی امین سالگرد ازدواجش

بيزيم ائوده، گله‌رك ائتدين اقامت اوْتوز ايل
سن منه، من‌ده سنه، ائيله‌ديگ عادت اوْتوز ايل
قاش- قاباق  ساللاما، آرواد! نه گوناه صاحبي‌يم؟
ائتميشم تكجه سنه چوْخلو اذيت اوْتوز ايل!
اوْتوز ايل‌دير گليريم اللي اوْلوب، خرجيم يوز
ائتمي سن دايماً، هر شئي‌ده قناعت اوْتوز ايل!
بير چؤرك- پالتاريميز اوْلمادي، بير شادليغميز
بيرده كي گؤرمه‌مي‌سن مئيوه، دويو، ات اوْتوز ايل
بئله زادلاردان اوْتر، انسان اريندن اينجير؟
گاه گيلئي‌ليك ائله‌ير، گاه‌دا شكايت اوْتوز ايل؟!
گؤزه‌ليم! آج‌ليغا، چيلپاق‌ليغا دوْز، چال- اوْينا
ائتمي‌سن، بيرده ائله بوْللو محبت اوْتوز ايل
بوتون ايش‌لر دوزه‌لر، وعده وئريب مسوْول‌لار
گره‌ك آنجاق اوْلا بيزلرده‌ده طاقت اوْتوز ايل
داها بوندان بئله، بيزلر اوْتوز ايل‌ده دؤزسك
ياغار اوْندان سوْرا گؤي‌دن يئره نعمت اوْتوز ايل
بيزه دؤولت چوْخ اوجوز قيمته بير ائو وئره‌جك
دؤز بو مسكن وزيري ائتسين عمارت اوْتوز ايل
اوْتوز ايل سوْنرا گله‌ر سوفرايا نفتين پولودا
سوْنراسي بلكه رفاه‌دا اوْلا قسمت اوْتوز ايل
وار ياديندا، سنه من ائلچي گله‌ن گون‌ده دئديم:
«بيزه گل، تا گوْره‌سن بوْللو سعادت اوْتوز ايل»؟
بوْشلا اوْوعده‌لري، ايندي قولاق وئر سؤزومه
خواهشيم وار وئره‌سن بنده‌يه مهلت اوْتوز ايل
اوْتوز ايل‌ده داها دؤز، وعده‌م اگر چيخدي يالان
اوْخو اوْندان سوْرادا باعثه لعنت اوْتوز ايل
يوخ‌دور «آرش»ده مقام، تك اوتانان بير اوزو وار
اوْدوكي احساس ائديب چوْخلو خجالت اوْتوز ايل